बम्घा काठमाण्डौ समाज: परिचय

“वम्घा काठमाडौँ समाज वम्घेलीहरुको साझा चौतारीका रुपमा स्थापित हुन पुगेको एउटा संस्था हो, जसले वम्घाबाट काठमाडौँमा आई बसोबास गर्ने व्यक्तित्वहरुलाई जोड्ने पुलको काम गरेको छ।”

विविध पेशा, व्यवसाय, रोजगारी, शिक्षा तथा अवसरका खोजीमा काठमाडौँमा आई स्थायी वा अस्थायी रुपमा बसोबास गर्ने व्यक्तित्वहरूबाट यो समाजको गठन भएको हो। गुल्मी वम्घाबाट काठमाडौँमा आई काठमाडौँमा बसोबास गरेपनि एक अर्काबीच चिनजान नभएको, दुःख सुखमा वम्घा नै सम्झिनु पर्ने, आफ्ना आफन्त, छिमेकी, दाजुभाइ जमघट हुन वम्घा नै जानुपर्ने स्थिति थियो। आफ्नै गाउँका मान्छे जम्माभेट भएपनि नाचिनिने समस्या हाम्रो सामु देखा परेको थियो। सो समस्यालाई समाधान गर्ने, भाइचाराको सम्बन्ध स्थापित गर्ने र आपसी भेटघाट र सद्भाव बढाउने उद्देश्यका साथ सबैको साथ सहयोग र सहकार्यमा वम्घा काठमाडौँ समाजको जन्म भयो।

मातातीर्थमा (२०६३) मा ज्ञवालीहरूको कुलपुजा गर्न जम्मा हुँदै गर्दा वम्घाका केही अगुवा व्यक्तित्वहरूको पहलमा वम्घा काठमाडौँ समाजको परिकल्पना गरिएको थियो। मातातीर्थमा जम्मा भएर समाजको परिकल्पना गर्नेहरुमा डा. चन्द्रकान्त ज्ञवाली, ध्रुवराज ज्ञवाली चन्द्रमणि ज्ञवाली, विष्णु प्रसाद ज्ञवाली, अर्जुन प्रसाद ज्ञवाली, ईश्वरी प्र. ज्ञवाली, नारायण ज्ञवाली, यदुनाथ ज्ञवाली लगायतका व्यक्तित्वहरूको उपस्थिति थियो।

वम्घाबाट काठमाडौँ आई बसोबास गर्ने वम्घेली आमाबुबा, दाजुभाइ, दिदीबहिनी बीच आत्मीयता बढाउने, सुखदुःख, अप्ठ्यारो अवस्थामा साथ र सहयोग गर्ने साथै शिक्षा र स्वास्थ्य क्षेत्रमा समस्यामा परेका व्यक्तिलाई आर्थिक सहयोग गर्ने उद्देश्यका साथ वम्घा काठमाडौँ समाजको गठन गरिएको थियो। प्रत्येक महिनाको एकचोटि बैठक बस्ने, समाजलाई मजबुत बनाउनका लागि केही रकम जम्मा गर्ने नियम बनाइयो। समयक्रम सँगै दुई दुई महिनामा बैठक बस्ने र प्रतिमहिना संकलन गर्ने रकममा पनि वृद्धि गरियो। समाजलाई अझ मजबुत, फराकिलो र वैधानिक बनाउनुपर्छ भन्ने लागेपछि वि.सं. २०६६ सालमा तदर्थ समिति गठन गरी वम्घा काठमाडौँ समाजका नाममा वि.सं. २०६९ मा वैधानिक रुपमा संस्था दर्ता गरियो, जसको अध्यक्षता चन्द्रमणि ज्ञवालीले गर्नुभएको थियो भने उपाध्यक्ष विष्णु प्रसाद ज्ञवाली, सचिव ईश्वरी प्र. ज्ञवाली, सहसचिव अर्जन प्र. ज्ञवाली कोषाध्यक्ष नारायण प्रसाद ज्ञवाली सदस्यहरुमा यदुनाथ ज्ञवाली, हरिप्रसाद ज्ञवाली, विष्णु प्रसाद ज्ञवाली र जगदीश ज्ञवाली रहनुभएको थियो। समाजलाई के कसरी अगाडि बढाउन सकिन्छ भनेर राय सुझाव दिन डा. चन्द्रकान्त ज्ञवाली हरिप्रसाद ज्ञवाली ध्रुवराज ज्ञवालीको सल्लाहकार समिति गठन गरियो।

यसरी गठन गरिएको समाजले तीज कार्यक्रम, वनभोज कार्यक्रम, रक्तदान कार्यक्रम, शुभकामना आदानप्रदान कार्यक्रम, जेष्ठ नागरिक सम्मान कार्यक्रम, अनाथ बालबालिकाहरुलाई न्यानो कपडा वितरण कार्यक्रमका साथै प्राकृतिक विपत्तिमा परेका व्यक्तिहरुलाई पनि सहयोग गर्दै आएको छ। चन्द्रमणि ज्ञवालीको अध्यक्षताबाट सुरु भएको वम्घा काठमाडौँ समाजले सातवटा अधिवेशन र १४ वटा साधारण सभा गरिसकेको छ। अध्यक्षमा क्रमशः चन्द्रमणि ज्ञवाली विष्णु प्रसाद ज्ञवाली, रामप्रसाद ज्ञवाली, अर्जुन प्रसाद ज्ञवाली हुँदै वर्तमान वम्घा काठमाडौँ समाजको अध्यक्षता यदुनाथ ज्ञवालीले गरिरहनुभएको छ।